في اشعار له قال المواطن عصام حداد انه حريف بفرع بنك الUIB  في سوسة وكان يتعامل معهم لمدة 12 سنة دون مشاكل وتحصل منهم على قرض مزال فيه مبلغ 22 الف دينار.

واضاف عصام انه مؤخرا تم تسريحه مع 120 عون من الشركة التي كان يعمل فيها بسبب التداعيات السلبية لوباء الكورونا على القطاع الخاص وقامت بصرف مبلغ 17800 دينار له كتعويض “هبوط” في حسابه الجاري لكن ما راعه الا ان البنك قامت بتجميد وحجز المبلغ المالي بحجة ان البنك يريد ان يضمن حقه بعد ان تم تسريحهم من العمل.

واعتبر المواطن ان سلوك البنك غير لان المحاسبة تكون اذا لم يقم بتسديد القرض شهريا وليس من خلال  تجميد الحقوق ومحاسبة المواطن على تسريحه من العمل.

واضاف عصام ان البنك لم يكتفي بتجميد الاموال منذ 3اشهر بل يقوم في كل شهر  بوضع اشعار  معلوم القرض غير مسدد frais échéance non payé  ليتم اثر ذلك ارسال عدل منفذ له

وفيما يلي نص الاشعار:

عصام حداد Issam Hadded

انا كحريف بفرع UIB PANORAMA SOUSSE معاهم لمدة 12 سنة و ماهمش شوية كفترة و بعمري لكانتلي معاهم حتى مشكلة
بعد ها الكوفيد و المشاكل الي صارت و التبعات على القطاع الخاص انا كانسان وقع تسريحي من العمل لاسباب اقتصادية وقت الي انا موظف مترسم و كان ملف التسريح قد تم بتوافق مع الشركة الخاصة الي كنت نخدم فيها و تفقدية الشغل و تم قرار اعفاء ما يقارب 102 عون من الشركة و هنا و مع هذا التسريح قامت الشركة بتنزيل مبلغ مالي في حدود 17800 دينار نقولوا نحنا هبوط في حساب كل شخص قامت بتسريحه ، الى حد الان واضحين
انا شخصيا عندي قرض ما يقارب 22000 دينار تونسي مازالوا
شيعملولي هنا نهار الي تصبتلي الفلوس في حسابي الجاري نهار 31/8/2021 هو بيدو نفس النهار الي يبلوكيولي فيه فلوسي الكل خاطر سمعوا بينا وقع تسريحنا من الخدمة
هنا بربي نحب نفهم شنوه معناها تبلوكيلي فلوسي و نحنا بيناتنا عقد تحاسبني على كل شهر و تاخو فلوسك و قصاصاتكم كل شهر تاخذوا فيها مريقلة من قبل حتى ما يتم تسريحي من الخدمة
مشيت حكيت معاهم قال شنوه نضمنوا على فلوسنا يا ولدي بانا حق بيناتنا قصاصات موش خالصة و الا قضايا او عندك اذن قضاءي و الا حاجة تخليك تبلوكيلي فلوسي و لهنا شنوه كان جواب رءيس الفرع بالنسبة لينا العقد ملغى !!! يا ولدي شنوه ملغى عندي فلوس عندكم تحاسبني على كل شهر و نهار الي ما تلقاش فلوسك ايجا حاسبني و طبق القانون المعمول بيه
حاولت بشتى الطرق و النافع ربي يمشيو فيا و يجيبوا من الفرع الي انا فيه و بين الادارة الجهوية متاع UIB الي في سوق الاحد بسوسة قال شنوه اعمللنا مطلب !!! معناها نعمل مطلب باش يعطيوني فلوسي هذا اخر ما صدر
انا بعد عدة محاولات معاهم توجهت لعدل منفذ و حكيتلوا كل شيء بالتفصيل و قلي ما عندهمش الحق و توجه في حد ذاته للفرع بتنبيه.
بعد التعب هذا الكل قلت انا في الاخير ماو عندهم فلوسي اتو كل شهر يقصو قصاصاتهم و امورهم اقل شيء عامين و نصف لقدام لين الواحد يلقى خدمة و حل لحياتو .
توه قريب 3 اشهر و فلوسي مجمدة و ما راعني كان كل شهر يحطولي في السيستام frais échéance non payé و ما همش يقصوا من فلوسي و الي هو المبلغ المجمد توه عندهم يساوي 16800 دينار تونسي
و يكملوا يبعثولي عدل منفذ قال شنية ماكش تخلص في les échéances متاعك توه !!! معناها مبلوكيلي 16800 دينار متاع قريب 3 سنين لقدام اقل شيء و تثقل عليا في القصاصات و ماكش قاعد تقص عليا و تزيد تبعثلي عدل منفذ من فوق
ما صحش عاد هنا العقد يعتبر ملغى كي انا وقع تسريحي !!!!! كيفاه تقلي ملغى و انت باعثلي ماكش تخلص في القصاصات !!!!!
معناها انا وقع تسريحي من الخدمة و صبحت بطال تكمل تنحيولي زوز فرنك عطاتهملي الشركة و تزيد تطالب من فوق
العدل المنفذ الي بعثوهولي كيف حكيتلوا بقى باهت و قلي ما عندهمش الحق و سهلت زوز محامين زادة و قالولي نفس الشيء و اشكي بيهم و انا حتى نلقى باش نعيش الساعة حتى باش نصب قضية
قطاعة الارزاق حسبي الله و نعم الوكيل فيهم كان الظلم و السرقة عيني عينك
تلقاو ملوطة ما يثبت الي انا وقع تسريحي لاسباب اقتصادية تخص الشركة كذلك تنبيه عدل المنفذ الي انا توجهتلوا و مشالهم توه شهرين لتالي و تنبيه العدل المنفذ الي بعثوهولي مع des imprim écran من application Uib باش تراو فيهم الفلوس الي صبتهملي الشركة و المبلغ الي بلوكاوهولي في نفس النهار و كيفاه ما همش يقصولي من فلوسي و يثقلوا عليا في les frais قال شنوه مانيش نخلص في les échéances
والقصاصات في جرة بعضها بالطبيعة ..

تعليق حر

لا ردود حتى الان

اترك تعليقاً

لن يتم نشر عنوان بريدك الإلكتروني.